2014年9月10日星期三

台灣WiMax大龍鳳


Autodesk老總Wendy Lee升職,Wendy大力本地推動BIM(建築信息模型),唔少政府及建築公司,甚至鐵路都有採用,Wendy應記一功。Wendy嘅博士論文亦以BIM為題,以前渠做兼職天氣女郎,如今間中填詞,多才多藝。

上星期,台灣WiMax業界搞大龍鳳。投得WiMax頻譜廠商大同電信,無法兌現投資承諾,台灣國家通訊傳播委員會(NCC)宣佈收回牌照,WiMax業者向NCC及行政院示威,威達雲端老總賴富源,當場下跪,場面壯觀,大罵馬政府背信棄義。

香港曾推適合WiMax嘅Unpaired頻譜競投,結果無人問津。台灣廠商則大舉投資,因唔少台資終端廠商,當年英特爾帶動推動。幾年以嚟,被LTE打到落花流水。台灣以為可借WiMax東風,電腦端終產業起飛,美夢成空。台灣政府面對現實,加上4G頻譜不足,必定向WiMax廠商收回,回撥作LTE用途。

美國Sprint曾托中興ZTE興建WiMax網絡,亦已宣佈後年關閉,損失慘重。WiMax係IEEE標準,亦曾經獲ITU通過納入IMT作為4G標準。如今4G已肯定係LTE天下,理論上WiMax大幅降低授權成本(LTE專利不少為高通持有,授權費唔平),又有大批廠商支持,可惜技術演進速度,始終追唔上LTE。全球WiMax網會逐一關閉,做開PC嘅台商,更風光不再(當然聯發科MTK除外);業者指責政府當年大力鼓勵,畀政府誤導,真係唔知怪邊個。

4G以CDMA技術為基礎,主要係充份利用頻譜。中國大陸有份開發LTE-TDD制式,可有效利用剩餘Unpaired spectrum,加上頻譜價格較低,LTE-TDD有機會全球配置,主導LTE市場,甚至有日超越FDD制式。中國政府大力推動LTE-TDD,改變中國高科技產業地位,當年押注LTE-TDD,如今有機會雄霸流動產業,可謂一箭定江山。



沒有留言:

發佈留言