收購成敗各有前因

近日春茗，連續見兩位前HP人，一位係富士施樂新任環球服務業務總監陳偉明，以前亦係IPG負責企業銷售。另一位則剛加盟O記，Dominic Mak出任核心技術部門（Core Technology）總經理。

O記香港台灣董事總經理係Karin Yip，之前响總部則擔任Exalytics一體機及大數據部門副總裁，以前係收購Hyperion而加入O記。今年O記力推Exalytics一體機實時分析，迎戰SAP嘅Hana，Karin坐鎮亞太區，亦負責BI及Exalytics。

相對起來，2007年O記收購Hyperion比較順利，當時Godfrey Sullivan同Larry Ellison有私人交情，收購有秩序及互信下完成，現時Godfrey Sullivan已出任另一家好成功軟件公司Splunk老頂。相對起嚟，20O3年O記收購PeopleSoft非常敵意，引發美國企業史上最長嘅收購攻防戰，合併過程唔少波折，引發好多爭議，長時期訴訟，留下唔少痛苦回憶。

上星期消息傳出，O記收購市務分析公司Datalogix用咗超過12億美金。Datalogix分析消費者實則購買習慣及網上行為關係，有助市務人員針對消費行為，瞄準投放網上廣告，有關課題熱門，可算係機器學習（Machine Learning），可以配合Exalytics快速分析。Datalogix從飛卜及Twitter等蒐集用戶資料，另一家比較活躍係Datasift。不過本港Twitter用戶唔多活躍，微訊仲似乎較多。

Karin亦講起，社交網絡及多種新媒體興起，美國O記聘請都係剛從大學畢業一至兩年新人。新人與舊人之間嘅交接，未來可能係一項挑戰。

收購唔易做，收購處理唔好，可能好麻煩。河床決定出售俾私募基金Thomas Bravo之後，最近出售SteelApp畀Brocade。聽聞話NPM產品亦放盤；包括Cascade同Opnet等，只保留Steelhead，結果打回原型。Brocade已擁有ADX負載平衡，不過由於向SDN進發，不斷四出收購。

河床可以話係MBA研究題目；從廣域優化Steelhead起家，以至四出收購，結果周轉不靈，出售業務畀私募基金。科技公司到咗一定規模，必然從有機成長轉向收購擴大，整合非常重要，河床連串收購之後，無以為繼，收入增長追唔上，結果股價長期受壓，經常同基金投資人周旋，舊年底甚至出動毒藥保衛策略（Poison Pill Defense），制止科技基金Elliot購入超過一成股份，最終仍難避逃私有化。