「超級聯繫人」Web Summit移師香港

股市大幅波動，國內IPO暫停。金融市場波動，可打擊實體消費，老美早已有前科，阿爺唔敢掉以輕心。但中央不惜一切干預，日後資金入國內股市更小心翼翼，最怕政治風險，隨時走唔切。投資國內，可能更要靠香港做「超級聯繫人」，388遲早變港人新寵。

國內市場波動，IT公司頭痛，設備愈貴愈難搞，送禮酬酢更大減。口痕友話，從高級紅酒價格，足以反映近日市場走勢。賤物鬥窮人，生意愈難做，酒愈飲愈靚，誠為怪現象。

言歸正傳，本月底香港灣仔會展再有大型IT會議；今次係愛爾蘭Web Summit創辦人Paddy Cosgrave移師到港，大會改名RISE。Web Summit一向聯繫大量創投基金及始創企業，係創投界「超級聯繫人」，在港舉辦亦係因為可接觸內地Startup；包括科大汪滔創辦嘅大疆創新，聽聞現時入股市盈倍數達七十幾倍；限時特賣母嬰網上店「蜜芽寶貝」，亦剛獲一億美金融資，國內乃全球最火紅創投市場，香港佔盡地利。

Paddy Cosgrave搞會議有何特別？一般會議只靠統籌搞手，安排講者或發請柬，Cosgrave就以數學、統計、社交技術，加埋機器學習，聽講仲有人工智能。結果Web Summit從愛爾蘭都柏林，四年前只有幾百人，目前過萬人參加。數據統計用途廣泛，但用於舉行國際會議；以Gephi、NetworkX、Datasift等工具組織撮合各方，可算新橋。RISE係Cosgrave亞洲區技術會議第一炮，大家拭目以待。