地球係圓嘅

Macroview可能係本港最大獨立系統整合商，據CEO佘總話，原來香港加埋中國內地，有成七百幾員工。佘總係新亞物理系舊生，楊綱凱教授高足，亦係中大MBA校友。今個星期六，又係每年一度中大校友日Homecoming，佘總同眾位新亞校友，返母校上台獻唱，呢個大家可能未聽過。佘總話，一向响新亞校友會參加嗓音班，今次係學員加上新亞校友攜手，校友日假中大邵逸夫堂演出「絲竹笙歌樂知音」演唱會負責娛賓，並由紅石樂團伴奏，請各位IT校友捧下場。

佘總唔係卡拉OK發燒友，但發現自己平日講嘢懶音太多，怕簡報時客人聽唔清楚，所以上新亞校友會龍景光先生開嘅嗓音班；呢位龍先生大有來頭，係業餘資深聲樂老師，指揮樂團；自幼研習中西樂器，又識中醫針灸、生理學、解剖學、音響學、嗓音學、氣功等，為新亞校友會開班授徒多時。佘總話學正音，唱好過講，日後亦介紹行政人員去上嗓音班，講嘢字正腔圓，中氣都好啲，話唔定將來有個Macroview唱家班。

Macroview係思科最大拍乸之一，講起思科；思科剛宣佈七億美記收購Acano，亞太區銷售總監Tony Giufre係意大利人，以前管香港TANDBERG，後來因收購入咗思科，獅子銀行又係TANDBERG大客仔，所以專門照顧獅子；後來跳槽去JPMorgan大通，然後入Acano，轉過頭又入番思科，證明地球係圓嘅。