瀏覽器又起峰煙

最近城中最熱門話題，係谷歌瀏覽器Chrome，呢個瀏覽器以作業系統方式製作，不單止快，而且穩定，當瀏覽器開幾個分頁一齊閱讀網站，其中一個分頁出問題，只要關閉有關嘅分頁就搞掂，完全不影響其他瀏覽中嘅網站，呢種完全分離程式列序嘅技巧好難開發。

為咗隆重其事，Google仲出咗一本漫畫書介紹，又在Youtube有示範，但最吸引嘅功能，可以話係字體放大功能，IE都有類似功能，但只有三個選擇，經常字體打架，好唔穩定。Chrome按住control鍵，再按加號+鍵，可以作十級隨便放大縮小，字體放到好大，都得好整齊，有老花就啱哂嘞。Chrome依然有好多問題，但講速度，就的確好令人滿意。

有競爭有進步，想當年Netscape主導市場，咪記急起直進，瀏覽器性能作三級跳，今日 Google又挑戰霸主，好戲可能還在後頭。咪記亦推出咗IE 8.-0嘅Beta（可能因為趕住應市反擊），雖然未得閒升級住，相信好快就會有 IE 9.0，加上咪記宣傳一向鋪天蓋地，比較呢兩個瀏覽器性能，應該係電腦雜誌最熱門題目，記者大把新聞做。

最近，商業智能電話一個接一個，除咗BB嘅Bold之外，HP又推出HP iPAQ 912。講起iPAQ，以前Compaq年代曾經紅極一時，PDA 年代曾經佔市場唔細份額，同Palm可以話分庭抗禮，但係依家差唔多被邊緣化。

HP在手提電腦市場大發神威，唔知會唔會益埋智能電話市場。HP iPAQ 912賣點喺又有輕觸熒幕，又有QWERTY鍵盤，加上長壽電池。但喺電話除咗講功能，仲要講形象。iPAQ定位比較模糊，要推真係要落力賣多啲廣告。有消息話，iPAQ可能分拆成獨立部門，唔知係唔係想賣俾人嘞。