HP反應快

HP嘅IPG（打印及影像系統）同埋PSG（個人電腦系統）發佈新產品，選址旺角朗豪酒店，亞洲區媒體人數達二百多人，認真係大場面。

消費市場一向係日本人嘅天下，以器材應用介面設計而言，只有蘋果可打破宿命，令日本人都要寫個「服」字。不過，HP嘅筆記簿在消費市場已經係一哥，呢幾年唔少人用筆記簿取代桌面，開正HP果瓣。但HP仍然似一家工程公司，多過消費產品公司，要做Brand Building同埋好Sensational唔容易。發佈產品當日，HP 完成EDS收購，又再裁員二萬四千人，又改組企業市務部門（亦係炒人）。不過，HP為咗加強品牌，最近產品標誌有啲改動，不過依然都係HP兩個大字，有乜唔同，見仁見智咯。

IPS嘅Alice話，部分投資銀行唔掂，的確影響短期業務，不過佢話HP嘅新一代噴墨印表機，响消費市場表現唔錯。

講起IPG，在本港IT零售市場，曾創出不少先河，包括在非傳統IT零售店設置櫃位，又訓練專業推廣人員，介紹IT產品，推廣手法層出不窮；有時玩埋Crossover，試過同化粧業合作搞推廣，好有新意。

但係HP印表機曾佔七成市場，要保持咁大佔有率好難，正所謂「福兮禍之所倚」，樹大自然招風，競爭者雨後春筍，簡直係紛至沓來，開講話「守業難於創業」，唔到你唔信。古人話「棄捐勿復道，努力加餐飯」，可能仲有排捱。

HP死對頭I記，最近企業傳訊部Florence話，I記會在十月六至九日，舉行全球性嘅InnovationJam，全球I記員工，不同企業員工，以及不同機構，會在網上連續七十二小時，不停就多項全球業務關心嘅議題，Jam下新意見，相信結果相當有趣。不過，I記唔少金融界客仔，經過雷曼倒閉，今後幾年想叫投資者信啲結構性產品，都好難咯！金融業生意難做，I記都有排煩。