流動運算推廣

近期，有關流動運算嘅市務推廣，熱鬧到不得了，前排台灣HTC推新機，而HP嘅2133賣斷市，跟著唔少廠商推出Netbook又砌一輪，最近不得不提RIM嘅新黑莓。

雖然黑莓嘅Bold 9000體積比上一代Curve大咗啲，但手感幾好，畫面清晰到可以睇高清（480x320，而Curve只有320x240），除咗3G，可以去日本，又有aGPS定位，加咗個二百萬像素鏡頭，而且多媒體功能勁咗好多，喇叭音響好靚，可以將iTune啲歌「星」落手機，不過在操作嘅暢順度，Bold比以前快好多，唔少人都大讚好嘢。

黑莓嘅定位係流動辦公室，所有辦公室嘅事務，都可以靠佢搞掂。據生產黑莓嘅RIM大中華區嘅Chris Ho話，嘅家居馬鞍山，每日返鰂魚涌嘅太古坊，交通要成一個鐘，公司總部又在加拿大渥太華，有成十二個鐘頭時差，所以每朝坐車都覆「伊貓」，返到公司當日嘅「伊貓」都處理完，一啲時間都唔嘥。

目前黑莓有成千幾萬用戶，由名詞變成動詞，可以話喺最流行嘅流動電話（或者電腦），不過手提電腦叉電，最多只可頂幾粒鐘，黑莓可以用足兩日。Chris話佢最近去旅行，滯留機場十幾個鐘，都係靠部黑莓繼續辦工，真係年中無休。

以加拿大嘅公司嚟講，除咗北電以外，RIM可以話最威水，產品橫掃全球。不過RIM嘅市場推廣鋪天蓋地，youtube上有唔少關於Bold嘅介紹，有人話除咗無咗輕觸式熒幕，肯定可以同蘋果iPhone砌過。

講返Netbook，最近IT業最激嘅市場推廣，反而唔喺講Bold，而係一部Netbook小型手提電腦推廣活動，請咗最近响旺角街頭藝術好出名嘅表演團（？）「好戲量」，即場唱山歌，部機叫做乜唔係好記得，不過推廣IT搞到唱山歌，相當特別，睇過段片嘅人都有啲驚奇。好唔好，就見仁見智。