代理市場熱鬧

IT選舉經已結束，兩位候選人都分別發電郵謝票。不過，今次選情緊湊，當選人不得不打醒精神，為行業爭取利益。

最近代理行業好熱鬧，首先係Fortinet委任群柏數碼（B & Data）做香港及中國區代理。Fortinet係Netscreen創辦人之一謝青嘅業務，可以講係目前最強嘅UTM（暫且叫做「整合式威脅管理」）。

不過講起Netscreen，佢哋三位創辦人都係清華大學學生，別餘兩位，鄧鋒同埋柯嚴，就投資咗落一家叫北極光風險投資基金，支持一家Netscreen前員工創辦嘅山石網絡通信，開發咗一隻叫Hillstone嘅防火牆，聽講國內賣得唔錯。前日去另一家代理商MTech响「爛鬼坊」搞嘅酒會，見到以前Netscreen嘅Gabriel Wu胡威，原來佢離開「實蕉」後，亦返去Hillstone打工，而家駐守廣州。Hillstone嘅總裁童建，以前係Netscreen硬件研發部經理，亦係清華人。

講起Hillstone，呢隻防火牆亦係以速度見稱，全部埠位都係以兆（Gb）速，發展路線跟以前Netscreen差唔多。Netscreen最初亦在服務供應商市場打響名堂（目前唔少國內電訊公司開始採用），好多人用嚟做第三層防火牆，再逐漸由點至面，成為防火牆一哥。

見到Gabriel，問下佢幾時帶Hillstone嚟香港，佢話防火牆正申請ICAS認證，所以暫時只俾本港部分用戶試用吓。不過佢哋嘅防毒產品，應該好快進入本港市場，暫時仲搵緊代理。