有遮送─小紅傘駕到

上星期收到俗稱「小紅傘」Avira嘅孖屐亭Amy小姐來信，呢家德國防毒公司終於登陸，仲選擇本港為北亞洲區總部，進軍南韓中國大陸。「小紅傘」一向有免費版本Avira AntiVir Personal，影響系統執行速度低，佔用空間亦好少，免費版本可按以下網址單撈：

http://free.avira.com

防毒競爭好大，除咗S同埋M等大字號外，N同K字頭亦增長好快，最近N字頭防毒仲贊助咪記七仔推出嘅孖屐亭，使咗唔少錢；本來話S字頭想參加，都俾佢哋打冧，可見筆席唔細。A字頭又入埋嚟，功能好先進，有WebGuard堵截網站攻擊。

講起咪記，下個月會同時推出七項產品嘅新版本，可算係紀錄。孖屐亭當然忙到氣咳，其中包括Exchange同Office 2010，都係重頭戲。

Office 2010好多新元素，所有版本都包括咗OneNote 2010。OneNote以前只跟住Premium版本，或者要另外購買，搞到流行程度麻麻。OneNote設計人性化，可以處理任何格式資訊，輕鬆剪貼集合，再迅速分享，用嚟傾破席就好啱用。講起Office，最大敵人可能就係自己，說服用戶升級唔容易，每次新版少不免要加啲新功能，氹人落疊。不過要大家明OneNote係乜，亦唔容易。

咪記B小姐話，佢哋剛推出為IT人提供嘅免費技術諮詢，呢項服務香港獨有，無資格審查，人人有份，可以上Facebook參加。