hp業績勁

今個星期香港hp仲放緊大假，不過星期三公佈嘅季度業績就非常醒目，盈利升咗25%，營業額升咗8.2%，包括伺服系統同技術服務嘅TSG部門，成為盈利嘅主要來源，個人電腦銷量亦大升，不過一度係現金牛嘅打印影像部門，即係IPG嘅盈利比重，就一路下跌，真係花無百日香。

另一個消息係思科終於同hp一刀兩斷，唔再有拍乸關係，hp賣Procurve交換器，跟住食埋3Com，思科當然唔會再當hp 係朋友。思科UC係hp技術服務其中一大瓣，數據中心業務亦用好多思科產品，無咗真係好傷，不過以前可能主力推3Com。今次最大得益者，當然係Datacraft或者Macroview嘅大SI。

不過思科會唔會好似hp同I記，擴充技術服務部門，真係好難講。思科同名牌手袋一樣，深受A貨困擾，最近有位華藉男子，因為响美國兜售思科假貨，判三十個月監。兩年前，美國FBI就曾搜出過七千八百幾萬美金假貨，深圳賽格就有唔少思科路由器配件，究竟有幾多假貨？真係話唔埋。以前話軟件翻版，估唔到硬件亦不能幸免。

意馬國際拍完《阿童木》，幾乎沒頂。結果由紅籌之父番薯梁，入股一億三千幾萬買入控股權，股價即係番生。意馬以前叫寶途國際，專門做聖誕樹，後來轉咗做電影動畫製作，曾經係好幾家科技公司；包括Autodesk、EMC、Riverbed、甚至IBM嘅用嚟做畸史嘅生招牌，上述牌子都無平嘢，意馬當然投資唔少。不過《阿童木》唔賣得，即刻一鋪清袋，真係高風險。