出埃及記

《約伯書》（The Book of Job）係聖經舊約最古老優美嘅詩歌，講希伯來人約伯緊守純真，以傑出嘅信念同堅忍，經苦難洗難磨鍊，受上帝稱許。iPad出世，《經濟學人》用《約伯書》嚟比喻iPad。蘋果出中文新聞稿，標題係「價格難以置信的神奇革命性產品」，尺寸大咗嘅iPhone，完全無新意，唔算神奇革命，最平賣499美金，的確好平。

屏幕同亞馬遜Kindle DX一樣，都係9.7吋。iPad有彩色multi-touch，Kindle賣489美金，唔減價點賣？深圳山寨都唔夠iPad平。聽講話，生產iPad嘅富士康，急聘三萬幾人。嫌蘋果股價貴，稔下富士康。

平板電腦唔係新概念，咪記响02年就推出，最終曲高和寡，價錢唔平，賣成兩千幾美金，流行程度始終一般，Netbook經驗證明，最緊要係平。Mac咁平，PC廠家有排煩。iPad又係出版業寄望所在，賣內容遊戲，隨時一鋪翻身。

相傳話《約伯書》出自摩西手筆，蘋果從敗部復活，真係靠佢帶領，走出埃及。

收到豬扒新聞稿，話同Polycom達成合作關係，睇極唔明。可能因為思科同埋Tandberg合併，終於要有啲動作。

踏入2月，新產品繼續出籠，單記推Backup Exec新版本，唔少分銷商上去受訓，新版終於有Dedup，依然係PureDisk技術，兩樣都係單記重頭戲。2月份尾跑渣打馬拉松，發燒友好似單記老頂Michael，日日顧住練跑，原來唔係位位IT老頂都鍾意高爾夫。講起高爾夫，hp嘅發哥好犀利，一直單差點，打遍IT無敵手。