風水電話

自從Google出咗Android，又宣佈Chrome平台嘅Netbook即將面世，諾記率先出番部Booklet反攻，從手機打返入電腦市場。不過實際意義有幾大，真係好難講。

個人電腦嘅經營生態，同手機完全唔同，諾記功能上亦無優勢，加上唔係用自己作業平台，消費者點解買部諾記電腦，稔極唔明。市場學上，有所謂產品差異化，諾記响Netbook市場有乜殺著？

諾記電話仍然佔市場首席，佢哋嘅Bruce Lam一向特別鍾情流年運程同風水應用，大家唔駛搵哨牙通，自己都可以睇風水，N97同埋N97 Mini有電子指南針，加埋「流年流月飛星圖」同「風水羅盤」，就可以自己睇埋旺位，諾記有風水大師做生招牌，仲話有專業版。其餘Gphone亦有風水羅庚，iPhone除咗可以睇風水，最近仲話可以醫暗瘡做美容，功能愈嚟愈匪夷所思。

手機商推出大批 Android版本，尤其平價版開始出現，IDC話2013年會成為第二大平台，咪記都加快升呢，今年Windows Mobile即將推出7.0。舊年年中先至推出6.5，估唔到唔到一年，咁快就出7.0，聽講話功能大提昇，完全脫胎換骨，聽住先。