太陽風吹到香港

剛剛收到通告，响亞洲區愈來愈多人用嘅Solarwinds，剛剛公布一家叫「救生艇」（www.Lifeboatdistribution.com）做本地分銷，為本地代理服務。Solarwinds做網絡性能監察，用戶愈來愈多，尤其係關於CatTools以及備份管理網絡嘅裝組，亦越嚟越多捧場客。Orion系列嘅網絡性能工具亦開始多人用。呢家公司亦推出好多免費工具，香港比較多人熟悉係監察咪記Exchange嘅Exchange Monitor，亦有監察思科嘅Netflow同埋SLA工具。

Solarwinds免費工具普及，對於打響名堂好有用，上網睇下幾多聯位空缺，搵人管Solarwinds就可略知一二。不過呢家公司好似無駐香港代表，最近頻頻搵Hoffman公關出稿。「救生艇」嘅亞太區業務，就由阿姆斯特丹辦事處負責。Solarwinds嘅亞太區代表亦只駐新加坡嘅Harold Klaje，此君以前係Datacraft亞洲打工，所以好熟網絡產品。呢家公司舊年五月先上市，磅水嘅幾間金主都好有名；包括鼎鼎大名嘅Bain Capital（曾經响2006年夥同華為，想用二十二億美記現金賣起3Com，不過唔成功，結果舊年hp終於用二十七億美金奪得3Com。Bain舊年入股國美電器，就好多報導。）。Solarwinds舊年招股價12.5美金，表現一直唔錯，而家升到18蚊水平上落，唔少股評建議買入，算有交待。

雖然話佢哋無Openview、IPSwitch、BMC、CA、Tivoli或者NetIQ咁出名，不過價錢夠平，功能唔錯。美國公司精兵簡政，Solarwinds亦唔例外，好靠分銷商幫佢哋做孖屐亭，不過家連分銷商都話响荷蘭，真係要靠有麝自然香。

講起分銷，老牌電腦Gateway委托咗聯強做本地代理。奶牛電腦曾在九零年代好有名，但O七年已經俾宏碁收購咗。聯強一向係宏碁本地分銷，所以做埋Gateway，孖屐亭就由宏碁嘅Magma孭番。宏碁响國際市場佔第三位，呢幾年增長好勁。