Windows Mobile 7

睇通告，先知原來以前咪記嘅總經理Herman Lam，幫完老婆搞生意，而家去咗數碼港做行政總裁。江湖傳聞話林太好旺夫，由拍拖到結婚，Herman都好順利。不過，佢做數碼港，又可以經常見番舊時啲兄弟，咪記始終係數碼港嘅拋錨租戶，但係唔知見得幾耐。咪記嘅租約下年到期，如果咪記唔續租，咁樣「數碼港」真係可能剩得個「講」字。請咗Herman，現任老總PY唔知會唔會俾番啲面。

數碼港風水可能真係幾好，耐唔耐有人就話發咗達唔駛做，例如開咗網站賣竉物糧做唔切之類。咪記生意忙到飛起，係人都知，春茗見到總經理PY，問佢從JOS到咪記，會唔會唔慣，佢話JOS仲忙，因為貨走唔切，會好大鑊。

咪記五月份會推Office 2010，而家急急籌備，Terence Chan忙到一頭煙。見到舊年MIX大會上台做棟篤笑嘅Andy，佢又話要飛美國準備推Windows Mobile 7.0。佢又話，7.0會加埋 Zune同Xbox 360做整合，Zune係咪記嘅隨身聽，同手機整合，一啲唔出奇，反正iPhone都唔多似係一部電話。但電話加埋Xbox就幾算有噱頭，以後手機終於真係可以用嚟「打」嘞。

Windows Mobile 6.5之後，咪記响手機市場嘅佔有率，就唔多老黎，再改名7.0，唔知唔可以掂番啲7仔嘅氣勢。謝天謝地，7.0終於有多點觸控，遲就遲咗啲，始終好過無到。