2010年11月24日星期三

首台國產鐳射打印機面世

唔少人謔稱鐳射打印機廠商專門「走粉」,因為賣打印機,其實意在賣耗材,打印機利潤好有限。打印機廠商又最憎生產代用耗材嘅廠商,因為掘好個井,俾人飲哂啲水。不過代用耗材價錢平,唔介意犧牲少少質素嘅用戶,樂意採用。全球最大代用耗材嘅生產商,係中國珠海嘅賽納科技,佔咗全球代用耗材市場嘅一成。

據賽納嘅公佈,O九年佢哋營業額,達到六億七千萬人民幣,即係話代用耗材市場嘅規模,每年約有六十七億人民幣。

打印機印擎技術,主要都由美國同日本廠掌握。雖然代用耗材平價,但大部分仍然使用原裝行貨,據估計只有二成打印機用戶,轉用咗價錢較低嘅代用品,但係已經令打印機廠好頭痕。最近呢間令打印機廠頭痛嘅賽納科技,公佈研發出擁有中國自家開發知識產權嘅黑白鐳射打印機,九月初北京搞發佈會,大家都拭目以待,想知道國產打印機,速度性能有幾高。

鐳射打印機價錢之低,差不多進入割喉階段,開始淘汰黑白打印,進入彩色時代。HP嘅彩色噴墨打印技術,效果成本更幾乎同鐳射彩色睇齊,幾百蚊已經有交易。賽納科技此時此刻,先進入黑白鐳射市場,幾乎可話係水尾,勇氣可嘉。

不過賽納科技從二OO六年成立,四年已經做咗代用耗材一哥。董事長汪東穎話,目前仲有八成 人用緊原裝耗材,呢啲人習慣好難改變,即係仲有二百六十八億人民幣空間嘅生意可做,發展自家打印機,可以話勢在必行。將來HP或者佳能,會唔會推出兼容賽納嘅代用碳粉?
可能做人真係應從好處想,否則真係乜都唔駛做。

沒有留言:

發佈留言