土豆美國上市？

上個星期，專門推動多頻道收費電視嘅CASBAA香港會議閉幕，不過臨尾果日，竟然由CEO王微（Gary Wang）上台講土豆營運模式。香港晚上好多人攞住電腦，上土豆煲劇集。

今年八月，新加坡淡馬錫第五輪融資入股土豆，金額達三千五百萬美金，土豆話準備明年响海外市場上市（另一家國內視訊網優酷，亦話有同樣計畫），首選美國納斯達克上市。王微到港CASBAA講營運模式，係唔係上市前吹風？但係土豆嘅版權爭議好大。美國佔全世界人口百分之三，律師就佔全世界三成半，打官司家常便飯，肯定磨拳擦掌。美國反華情緒高漲，日日鬧中國搶走美國工人飯碗，知議產權爭議極大，一旦上市時公開盈利，仲有得剩？假設土豆刪除爭議內容，流量肯定大跌，估值又剩番幾多？到時股東可能變成苦主。最新消息係胎死腹中，會唔會轉到香港上市？

最近土豆開戲，拍電視劇「歡迎愛光臨」，針對年青觀眾變身網上電視台，土豆唔通可以變TVB buddy？CASBAA話亞洲區收費電視客，有成三億三千幾萬人。土豆又拍住中國移動，進軍數碼手機電視（唔係鴨記果種，真係純數碼廣播嘅流動廣播電視），搞收費電視。

今年七月，中移動投咗香港唯一流動電視牌照，香港好可能用CMMB。大陸推嘅 CMMB制式手機電視制式，亦支援收費嘅內容，流動電視中有所謂CA技術（即係「條件接收」，利用加密技術按不同付費模式，設定用戶手機可收睇乜嘢節目；假如無CA技術，流動電視就唯只有靠哂廣告收入），係數碼無線廣播收費內容嘅核心技術。瑞士有家叫Nagravision嘅公司，响歐洲制式採用DVB-H流動電視CA市場，有好大佔有率，Nagravision亦响CASBAA，同台介紹大陸CMMB制式。CMMB壟斷大陸，大陸九成九CA都由呢家公司包辦，香港收費電視市場成熟，所以Nagravision趕住嚟香港搞宣傳。

手機電視制式七國咁亂，中國保護產業利益，肯定好支持响本港搞 CMMB。但係支援CMMB手機大部分係國內品牌，聽講仲耗電驚人，到時要帶多幾部手機出街。