科技股地震

上星期思科業務遜於預期，出現裂口下跌，星期二响美市，每股由廿四個幾美金，跌咗超過成半，笪落廿蚊水平。雖然話變幻原是永恆，須經風浪起跌，股市始終有幸有不幸。但係揸咗股票（或者荀）之人，牙痛咁聲。

思科話業績唔好，主要係政府開支跌咗，原來思科有兩成幾收入靠政府開支（主要係美國）。不過思科一打乞嚏，全世界傷風，科技股普遍下跌；好似豬扒、F5、Radware，甚至I記同HP應聲下跌，真係無獨善其身呢樣嘢。

不過，豬扒同F5反彈力驚人。豬扒仲曾經上咗去三十六蚊，勁過之前。講起F5，今年股價表現可謂嚇死人，年初只有五十美金，至今升咗一倍幾，到一百廿幾蚊水平。Q3業務好理想，季度收入有成兩億三千萬美金，亦比舊年升咗超過五成。Linda真係笑得出聲。

雖然話公共部門疲弱，不過蘋果嘅iPhone同埋iPad效應之下，流動網絡大塞車，好多網絡商等住升級。思科同其他網絡科技股，唔能夠太悲觀。