電訊大作戰

上星期最多人談論，當然係諾記舊老總去咗HKT做其首席市場總監，即係電訊盈科上市後變番嘅香港電訊BT。Bruce Lam做諾記有聲有色，而家去電盈，可能有兩個啟示，首先諾記唔易做，另外電盈流動電訊可能即將大搞作。電盈管理層大變，亦預示下年電訊業，好戲連場。

全球電訊商嘅兩大焦點，分別係流動電訊及雲運算。香港係全球流動電訊競爭最劇烈城市。舊年HKT嘅BT上市，文件披露市佔率係百分之十二左右，亦無公佈Arpu，以全港五家計，呢個數字唔多理想。

二ＯＯ二年，HKT出售 CSL俾澳洲Telstra，短暫退出流動市場。二OO五年，P仔買番Sunday，當時全港流動市場滲透率只有百分之一百一十，舊年OFTA公佈港流動電訊滲透率約係百分之一百七十五，每名港人擁有一點七部手機，即係每名港兩擁有半部手機；同期3G用戶增長咗超過十倍，二Ｏ一一年超過六百六十幾萬，表面好似係強弩之末，點知過去一年，平板同智能電話迅速冒起，流動電訊原來高處未算高，仲有大把增長空間。

舊年和電公佈上半年盈利上升三成半，CSL仍然持有本地最多流動頻寬，Arpu理想，擴充能力最強，從佢哋客戶中心豪裝程度，行過仲似為名牌店，就知道幾揼本，最近又打M2M市場，動作多多。

舊年，國際電訊業大搞雲運算。電盈舊年推出雲運算嘅uHub，可謂電盈唯一嘅雲運算儲存破席。電訊公司本身唔少數據中心，HKT仍佔本地寬頻約六成半市場，應有條件搞雲運算，但一直無乜動作。雲運算係電訊商摰愛，除咗賣線同埋有數據中心，亦有大把增值服務。Tom Chan過檔商業部門後有乜搞作，擔定凳仔。