貴租難捱

雖然赤口，新年流流亦要拜個年，祝各位行運一條龍，最緊要生意興隆。

新聞話銅鑼灣零售加租，戲院被名牌以二十倍租金趕走。雖然銅鑼灣區下年有大型商廈落成，但有唔少公司捱唔住中環，紛紛流向銅鑼灣，租金高踞不下。香港租金之貴，即使最賺錢嘅電腦公司，都話頂唔順，唯有向東發展，搬去鰂魚涌或者觀塘，結果東區食肆熟口熟面，全部 IT人。

聽講O記亦捱唔住利園嘅貴租，即將搬去太古坊。O記嘅水頭充足，都話頂唔順銅鑼灣，真係不易居。仍响銅鑼灣有HDS，佢哋賺錢唔少，人數又有限，金融客多，貴啲都無所謂。

記憶中，豬扒曾經一度中環核心地帶花園道，亦回歸太古城。回想幾年前，HP亦曾經一度亦响中環中心，後來約滿即刻搬返太古城。IT公司高層特別鐘意飛來飛去，港島東隅酒店房租貴得驚人，Sugar Bar日日爆滿。

據剛响九龍灣搬大屋嘅FalconStor老總Carlo話，九龍灣甲級商廈供應極為緊張，經營數據中心嘅Atos亦在同一大樓，本港IT公司多數以銷售或支援為主，交通不便，好難搬去數碼港，好似咪記唔少同事，其實响屋企返工，平日唔多碰面，平日用 UC 保持聯絡。

記憶之中，只有好似高通同英特爾一類，仍有資格留中環打躉，「單記」仍响其實係灣仔嘅中環廣場，隔離鷹君有思科。