Kindle火都嚟埋

二O一一年尾，突然傳咪記有可能收購黑莓，流動電訊真係唔易做。從HP嘅TouchPad出師未捷，Dell處於陪跑狀態，證明 Tablet市場唔容易做。另一隻以Android 2.33作業系統，號稱全球最平嘅亞馬遜 Kindle Fire平板，售一百九十九美金，折合港幣一千五百大洋，但無GPS無藍芽無3G，只有亞馬遜支援嘅雲端技術Silk瀏覽器，加埋電子書，抵唔抵？見仁見智。

實際上，國貨Tablet競爭力唔曳，ZTE中興嘅Light Tab 2，速度更快，同樣7吋熒幕而且有鏡頭及GPS，而華為IDEOS S7 Slim有3G，解像較低，街價不過港幣二千八百八十八。

Kindle Fire一出，已被批評有蟲，急出補丁救亡，又跟iPad一樣，美國以外唔能夠訂電影音樂，好多功能局限於美國境，亞瑪遜支援嘅Kindle應用有限，結果要開放用戶安裝Android市場應用，網上又瘋傳破解嘅Root方程式，Silk瀏覽器同樣毀譽參半，用戶投訴雲端技術，仲慢過Chrome同IE好多，Kindle Fire嘅命運，可能好似TouchPad一樣，統統被改頭換面，亞馬遜白忙一場，回復推銷黑白年代Kindle，除非亞馬遜有身作業系統，否則始終為他人作嫁衣裳。

踏入新一年，外圍經濟唔好，香港難獨善其身。美國經濟轉勢，始終唔會話馬上強力反彈。加上美國經濟回升，息口回升，可能亦非好事。經濟前景趨向審慎，年底電訊股表現亦一葉知秋，MSCI電訊服務指數一路向下，各大電訊公司，包括V仔凍結人手，顯示電訊前景麻麻地。最近P仔亦告重組，聽講做開消費部門嘅Tom Chan，轉去睇商業服務，Gary除咗繼續睇工程服務，仲兼顧愈嚟愈競爭劇烈嘅數據中心。