局長難搵

CY梁當選，其中一項競選承諾係現有的商務及經濟發展局，分拆成工商及旅遊局和資訊科技局。究竟資訊科技局誰人任局長，有報紙話貼係艾維朗、王錫基、區文浩；三位都同樣都係工程師，曾經做過電訊管理局阿頭，全部同電訊業有關。

目前艾維朗係香港電訊打工，高薪優職，一來未必對局長有興趣，CY會否指派一名外國人擔任，亦成疑問。王錫基已屆六十四歲，年紀可能係一個問題。區文浩則係隨王錫基後擔任電管局阿頭，同王錫基同年，退休後去咗中大進修比較歷史，甚有性格。區文浩在任時，落實本港固定流動互連，力排萬難，雖然取消互連費，8號仔一度好唔高興，推動本港流動電訊嘅發展，肯定應記一功。

不過區文浩年紀唔輕，離開政府亦已五年，業界發展面目全非。近期政府對數據中心發展好有決心，謝曼怡接任常秘後，成績有目共睹，協調部門甚有效率。但側聞謝小姐唔多想權位高過渠位靚仔老公周達明，接任可能性未必咁高。CY梁會唔會向業界招手？近年本港搞數據中心，同新加坡爭崩頭，建制派中EMC阿頭Gabriel Leung亦好活躍，曾組「ICT動力」參加選舉委員會界別分組選舉，聽聞有意棄商從政。

新政府班子組成，五月前應有定局。聽講HP兩個部門合併，亦會响五月份落實到本地。下星期PSG介紹春季產品，包括今年重頭戲Ultrabook，唔知會唔會有啲心情複雜。