數據中心成為電力公司新貴

雲運算流行，數據中心愈來愈多，「會長」Daniel Lai加入OGCIO，其中一個任務，係協調不同政府部門，致力吸引外國投資，例如點樣將工廈轉成數據中心用途，本港有大量工廈空置，用嚟發展數據中心，可以話「合哂合尺」。

數據中心係用電大戶，兩家電力公司當然唔吼實呢批大客仔。港島區有唔少金融機構，加上兩家電訊公司同港燈有啲關連，座落港島數據中心亦唔少。不過，近期將軍澳亦有唔少新數據中心 落戶，加上九龍區工廈唔少，中電亦向媒體積極介紹，吸引數據中心嘅招數。

數據中心耗電好犀利，高端數據中心電力需求，相等中型屋苑約5幢40層高住宅供電，一般工商業嘅大廈，只能滿足兩成電力左右需求，每年電費以千萬計，電力公司加強要配電，電力亦要求好穩定，全天候不停電。

2011年亞洲雲運算協會 (Asia Cloud Computing Association)公佈「雲就緒指數 (Cloud Readiness Index) 」，香港排行第二，電網質素排名第一。香港供電出名夠哂穩定，原因之一係唔少電纜埋响地底，行雷閃電無有怕，缺點係成本貴，電纜亦要直接埋泥中，出問題時容易偵錯。

世界銀行發表嘅「2012經商環境報告」中「申請電力供應」項目，香港亦獲好高評價，排行第四。原來香港响2011嘅報告中，「申請電力供應」一項係依然排名第二十二，今年竟躍升咗十八個位置。據世界銀行本港經商環境响「處理建築許可證」（Dealing with Construction Permits），排名全球第一，究竟有幾多公司嚟香港做生意，申請「建築許可證」，耐人尋味。

以申請電力供應一項，亞洲區排名首位原來係台灣，已經連續兩年全球排第三。新加坡嘅排名就下跌咗一位，從原本嘅第四跌到第五，畀香港扒咗頭。

講起雲運算，明日上午沙田香港科學園「高錕會議中心」舉行「香港雲計算標準聯盟」成立典禮，創建機構包括咗香港電腦學會、香港通訊業聯會，國際信息系統審計協會(中國香港分會)、香港軟件行業協會、香港科技園公司、香港數碼港等，主辦單位發通告話邀請咗候位特首CY梁，不過渠星期四早上先從北京返港，睇嚟好難趕得切，不過渠有考慮出席，可見數據中心業務舉足輕重。