IT股愈炒愈旺

但係河床公佈業績後，上星期五就曾經一度急跌近三成，係呢隻明星股上市以來，最大單日跌幅。原因係第一季增長慢過預測，令市場感到河床嘅高增長時代經已成為過去，不過河床解釋話，由於加入新產品，政府開支萎縮，導致收入下跌。

年初河床推出新產品，前年有Cascade，上年推Stingray，今年就有專門用於加速儲存嘅Granite。剛過去呢個星期，同夥拍全球最大CDN，Akamai推出專門加速雲運算嘅Cloud Accelerator。不過，河床响主要產品市場網絡優化，已佔超過一半市場，增長靠自然增長。以地區計收入增幅，主要來自歐非中東市場，歐債危機深化，亦有啲影響。不過河床產品定位清晰，技術一流，加上食正條水，長期仍然可以睇好。

上星期中終於剛上市嘅Splunk，上市後急升達一倍，市值超過三十億美金，Splunk仍然未有錢賺，已經升到爆。渠哋自己定位為專門分析大數據（大引擎）嘅搜尋引擎。不過最萬眾矚目，莫過於下月中上市嘅臉書（Facebook）。

另一隻上星期五上市嘅Infoblox，首日股價升超過四成六。呢家公司由前Netscreen老頂 Robert Thomas做老頂，專門做網絡自動化技術。另一家專做新一代防火牆嘅Palo Alto Networks已申請上市，有唔少Netscreen舊夥計，但正被豬扒控告侵權，唔知有冇影響。

唔少保安公司陸續到香港開拓市場，美國增長最快嘅Rapid7，聽聞仲一直係單記嘅收購目標，舊年再獲Bain Capital等基金大筆注資五千萬美金，離上市日期不遠；近期成立香港辦事處，從「賣咖啡」請咗靚女珊姐。另一家做零日攻擊（Zero day attack）嘅EyeFire亦四圍搵人，IT市場突然間好熱鬧。