英特爾有難

上星期，IDC公佈今年首季個人電腦銷售急跌一成半，個人電腦廠商股價紛紛下跌。英特爾及微軟當然首當其衝，雙雙下跌。

長久以嚟，英特爾X86戰無不勝。但流動運算興起，蘋果同Android採用ARM處理器，終端運算形勢大變。ARM廠商以Fabless嘅生產模式，令價格大幅下降。ARM處理器量產，終端處理更具競爭力。

HP嘅IPSG新老頂Monty Wong，曾出任泰國總經理，當時英祿競選總理，提出承諾向六至八歲學童，送贈一百萬部一百美元以下Tablet嘅口號。結果英祿當選兌現承諾，供應合約由深圳市希科普科技（Shenzhen Scope）奪得，以八十一美金一部，供應有史以來最大電子平台Tablet學習計畫。迄今泰國政府向學童發放八十萬部Tablet，使咗七千五百萬美金。

Monty話，雖然希科普科技產品，質量引發唔少爭論，以價格論，七吋 Tablet，速度1.5GHz處理器，完全打破價格思維。上月HP亦公佈推出訂價169美元的ARM平板Slate 7，微軟亦擬加推ARM平台嘅Windows RT。

Tablet價格咁低，除咗中國係全球最大價格破壞者，背後仲因為ARM處理器商業模式，非常有效率。ARM由英國劍橋ARM控股設計核心，授權畀數以百計廠商，包括蘋果、三星等，亦包括類似高通專門廠商，加上不同通訊 及增值功能，百花齊放，再交由晶圓廠，類似「台積電」代工。ARM大幅降低成本，係因為高科技最大成本，就係投資錯誤。ARM嘅錯誤成本分散由唔同廠商承擔；英特爾錯誤，則由一家廠商承擔。即使英特爾設計出更低耗能處理器，成本上亦無可能勝過ARM。

ARM處理器耗能低，價格迅速下降，加上觸控技術及Android平台，HTML5語言，可以話係完美風暴。台灣韓國多家廠商，包括HTC同三星發展嘅ARM處理器已相當成熟。

伺服端方面，上星期HP推出Project Moonshot成果，推出首部軟件定義伺服系統，大幅降低能耗，雖然開始時支援英特爾Atom，日後亦可利用Calxeda合作嘅ARM處理器。但最早投向ARM處理器係Dell，Facebook甚至製作可用ARM處理器底板。ARM唔單止價格更低，可大幅減低數據中心耗能。

唔少人仍以為，ARM嘅Tablet只係消費市場玩意，難登大雅之堂。但英特爾亦係靠消費市場起家，唔少人以為CISC指令嘅X86難敵RISC處理器，結果最終就大跌眼鏡。同樣道理，唔少人預測Ethernet被其他先進網絡取代，結果Ethernet成為一統交換技術標準。答案一字咁淺，就係價格。目前無一項技術，可以取代ARM生產模式同價格上優勢。

英特爾仍在軟件架構上好有優勢，同微軟之間嘅Wintel聯盟，暫時保持企業運算領域優勢，但軟件商與處理器平台合作，只係時勢使然，軟件從平台之間切換，可以相當快，Unix應用從RISC快速過渡至X86，就足以證明。