小米加富士康

三星出新手機，宣傳撲天蓋地。相對之下，黑莓推Z10，HTC嘅One亦推出新手機，聲勢真係天淵之別，聽公關話，單係請記者飛美採訪，埋單已六十幾萬。三星靠手機食餬，對老記咁好，大家當然落力。

不過，最惹人臆想，仍然係郭台銘同小米之間，有乜搞作。郭老高調訪問小米，估計應有大動作。

郭台銘同蘋果新老頂Tim Cook老友，已經公開秘密，Tim Cook 專管供應鍵，多得郭總合作，先咁快大量應市。但有所謂將軍一去，大樹飄零，教主走後，蘋果股價浮沉，最近更被大陸媒介狂攻，出貨量又常傳出不利消息。富士康郭老高調訪小米，唔通蘋果真係開始老下坡，郭老急謀新客戶？

但係小米點解贏得郭總，小米Android介面控制先進，早贏唔少掌聲，即使高通技術高層，亦特別點名話好掂。好多人買咗部華為或三星，跟手就擦個小米。

小米手機一機難求，今年預計銷售達一千五百萬部，國內已好成功引起蘋果嘅期望心理。小米利用發佈免費作業系統，起唔少宣傳作用。富士通代工足以應付高精度手機，加上小米產品，擴大至智能電視，真係同三星對撼，有乜協同效應，大家拭目以待。

三星始終以消費市場為主，商業市場仍係蘋果天下。如今小米加上富士康，目標瞄準高端市場，中韓手機大戰，一觸即發。