小米配青檸批

IT同食物關係愈來愈大，究竟蘋果，小米、青檸批有乜關係？可能一時之間，比較難以聯想。

首先講蘋果股價，上星期美國研究機構Kantar報告，美國iPhone 5銷售呈現頹勢。富達基金Contrafund又減持蘋果，生果股價持續疲弱。

上星期話，郭台銘擴大同小米合作，暗示蘋果訂單減少，市場又盛傳蘋果好快出iPhone 5s，可能令想換機嘅果粉觀望，iPhone 5滯銷，Android繼續銷量上升。

高通嘅高層較早前話，Android迅速擴大市場，其中原因係本土化，高通推出所謂「QRD」 (Qualcomm Reference Design)，為不同地區手機商，優化手機應用；例如响中國大陸優化百度雲服務。QRD可畀手機生產商，快速發展適應唔同地區Apps嘅手機。中國高檔手機或平板，唔少亦願意考慮用高通。高通優化ARM處理器，augmented reality framework同AllJoyn framework，支援HTML5源碼等一連串技術，針對下一代手機性能。

ARM晶片成為取代Wintel嘅最大平台，多得新生產模式。ARM以極低授權費用，授權後交由類似台積電嘅晶圓廠代工（高通主要靠台積電），唔似英特爾，垂直生產至尾大不掉。ARM處理器價格有優勢。以高通屬Fabless晶門商，市值竟超過英特爾，證明生意模式可行。

高通同埋蘋果，都係用ARM架構，運算能力，尤其耗能更勝Atom一籌。ARM係RISC處理器代表，比CISC效能優勝，早有定論。唔少大陸平板都標榜直接用Cortex A8或A9原生設計。但即使以製程技術，始終唔及高通，今年第二季出樣本嘅Snapdragon 800，28nm製程技術（台積電生產），四核2.3GHz主頻，速度驚人。乜人會用？包括咗LG 801，Google Nexus 7 2.0（預計五月推出），仲有小米Mi3，傳聞Mi3有1080p顯示屏，加上1300萬像素鏡頭，Android 5.0版本（Key Lime Pie）系統，可能係富士康同小米合作首部手機。如果屬實，小米預載Key Lime Pie，同Google可以係乜野關係？今年小米上市，青檸煉奶批配小米，食起嚟可能幾和味。