火眼急跌

上星期美國科技股重創,其中火眼及Twitter大幅下跌。火眼公佈首季業績後,急挫二成,跌至二十七美元。兩個月前,火眼曾高見九十七美金,蒸發七十蚊美金。

火眼業績其實同預期差唔多,甚至可以講唔錯。但弊在任CEO嘅Dave DeWalt,業績公佈之前,响三月份以七十九蚊高位出售少量持股,引發其他基金股東不滿。結果DeWalt公開道歉,並話仍出售嘅火眼股份不足其持股量一成,以息眾怒。

火眼以上市集資繼續收購,上星期再公佈收購專做數據鑒證(Forensic)嘅nPulse Technologies。業界已有公識,防毒軟件完全失效,火眼呢類公司增長前景唔錯。

四月底,火眼亦率先公佈IE 9至11重大保安漏洞,叫「Operation Clandestine Fox」。IE瀏覽器訪問某啲網站,就可被攻擊入侵,黑客可安裝任何程式,甚至控制整部電腦,漏洞導致IE 成為首個被美國國土安全部點名嘅瀏覽器。據火眼今月初公佈,Operation Clandestine Fox亦已進一步變種,攻擊XP電腦。咪記IE佔市場約四分一,IE會推出修補,但無購買extended support嘅XP客戶,最好就唔好上網。估計IE市場佔有率,可能受今次事件拖累。

舊年有唔少網上泄密事件,最大單當然係Target。唔少公司開始考慮SIEM,其中一家得益者係Splunk。Splunk讀Log最快,好快可以出報告,聽講P仔亦好有興趣,明年Splunk市佔率有望再升。