不轉的風車

上星期香港科學園搞MakeIT Mashup聚會，人山人海；當然唔少得園內畢業生自
我介紹，除咗介紹納米技術養魚同機器人，亦遇到唔少創科名人。

其中一位係BWT街坊泥鯭CEO兼創辨人Albert Lui，已經被媒體訪問唔少次。街
坊泥鯭以共乘汽車App，解決交通問題；聽落唔似係大生意，但法國BlaBlaCar共
乘汽車，估值已超過15億美元，係法國最成功創科之一。至今至唔少乘客用
BlaBlaCar租車共用，甚至用來送貨。最近，BlaBlaCar俄國大受歡迎。

但係香港法例未配合共享經濟，共乘汽車只能以順風車方式運作。BWT街坊泥
鯭呢類創科，只能以另類方式生存，如集合乘客做共乘的士，或者穿梭巴士，
靠廣告收入頂住先，甚至經營商務車預約。流動科技令資源用得其所，減少浪
費，共乘汽車不單環保，亦可提高路面使用率。雖然BWT街坊泥鯭經營不易，
但Albert仍然樂觀，BWT街坊泥鯭收集得來數據，供園區研發之用，亦幫到大家。

Albert開發BWT街坊泥鯭App，但其實非讀科技出身，係理工讀孖屐亭，無心插
柳加入開發者行列。但科學園比較多Maker，例如XDynamics就同美心合作，以
自家設計飛行平台，空運冰皮月餅，保證新鮮，MakeIT Mashup聚會時仲示範飛
行，降落點非常準確。

唔少創科仍處於掙扎，經營不易，園區除咗提供增值服務，法律、申請專利、
研究、集資方面幫手，亦有暖心行動。

科技園行政總裁Albert Wong介紹，講到園區幫創科嘅新措施；包括延長冷氣開
放、又派杯麵俾OT租戶。最有意思果段，係講起科學園大樓頂部，有一部唔識
轉嘅風車，原來起初設計係部發電裝置，結果失敗告終。「我建議唔好拆，保
留住呢部風車，畀大家經過時望到，記住失敗唔重要，重要係嘗試。唔嘗試，
永遠無成功一日。」

突然省起，Albert經常提及西班牙經典文學作品「唐吉柯德」。意想不到科學園
內，真係有部風車；果位滿腔理想嘅現代武士，就在眼前。