陳家有女初長成

娛樂版見到港姐有位侯選佳麗，芳名JuJu Chan，花名「拉長鄭融」，原來係Infor亞太區老頂「陳伯」Lawrence Chan位千金。呢位「陳伯」唔識睇風水，不過已經响IT界打滾三十年，已經係老前輩。不過報紙唔賣，唔知Lawrence位千金已經亭亭玉立，有志進入娛樂圈，仲參加過港台真人騷。

Infor較低調，因為唔係上市公司，主要股東係有名嘅私募基金Golden Gate Capital Partners，係著名既軟件收買佬，其中本港較熟悉就係Systems Union嘅財務軟件SunSystems，亦有唔少ERP及供應鍵方案，中國大陸有唔少廠家客仔，包括生產「曼佳美」電燈膽嘅利安電光源。

除咗Sun，Infor亦收購SSA及Extensity，號稱全球業務軟件（enterprise software是也）第三大供應商（第一二位分別係SAP同Oracle），但本地收入主要靠服務同保養，近期推新產品唔多，以市場知名度嚟講，頭兩位勁好多；SAP最近因為IFRS（呢個原本係歐洲嘅會計標準，但美國亦宣佈採用，已經成為全球化標準），逐漸成國際標準，好多美資公司陸續符合規定，SAP自然有益處，聽講因此季度業績唔錯。Oracle業務一直唔錯，仲請緊人。最近仲贊助客仔睇戲，老細Ellison出埋鏡同Ironman握手，睇落兩人仲有啲相似。

講起IT界靚女，當然唔少得豬扒嘅Abby Tang，佢選港姐肯定三甲必入，佢响網站嘅技術專欄，亦深受歡迎。Abby已有三位小朋友，風采依然。佢哋响下個月二十三號，又會在金鐘Conrad，搞Juniper Solutions Day 2010，屆時應該可以見到Abby。另一位IT界靚女HP IPG嘅Stef Yeung亦名花有主。講起HP，佢哋最近亦開始用Facebook做宣傳，慶祝噴墨打印機連續八年銷量第一，終於賣咗一百萬部，請客仔環遊世界。

http://www.facebook.com/HPhongkong#!