I字頭買 M記 皆大歡喜

早前講美國IT業收購甚多，口痕友話美國經濟低迷，好多老牌科技公司嚟香港搵買家，唔少唉賓架上門。上星期四，爆出英特爾收購M記，代價達七十六億美金。據M記消息人士話，事前已有經傳聞，但一直話I記係買家，叫客仔入定貨。不過I記已經有ISS，業務同M記IPS重疊，好多人以為係吹水，結果原來都係I字頭，不過係「英特爾」，真係皆大歡喜。

目前，英特爾手頭現金超過一百八十幾億美金，伺服器需求好大，現金增長迅速，必須搵返啲出路，竟然買起一家軟件保安公司，令市場好意外。M記好多員工一向選擇每月收公司股份，收購之後一下子升咗五成，雖然只算紙上富貴，不過都好開心。加上新老板基本上無經營保安軟件，裁員可能性非常低，真係飲得杯落。

至於M記死對頭「單記」，市值已經超過一百億美金，儲存業務仲大過保安，唔係咁易成為收購對象。今次M記被收購，唔知算唔算好事。收購之後，雖然話實力雄厚，但亦會帶來不確定，英特爾响保安市場亦係外行，搞唔好外行領導內行。

英特爾以經營x86發達，一直四出搵唔同投資機會；包括做過網絡設備，連網絡打印機都出過，始終都係麻麻地。不過保安市場愈來愈傾向用所謂「Programmable ASIC」，利用硬件加速各項保安，好似豬扒嘅新路由器同埋SRX，都有類似性能，可以响硬件層件做Deep Packet Inspection，最近賣得唔錯嘅Fortigate，就完全係ASIC設計。英特爾响晶片方面在行，所以睇中M記。