IT服務競爭大

上星期HP終於宣佈，Cally取代Eric做本地MD。Eric响新加坡住，經常飛來飛去，好唔方便。所以外間以為佢任期唔應該太長。另一方面，HP老頂因為涉及性騷擾請辭。以前本港有啲IT公司曾經有過類似問題，所以連老頂都無房坐，結果全人類Hot Desk，即係話要搞唔該行遠啲。Mark哥其實做得唔錯，因為呢類問題落台好唔值。

HP買咗3Com，照以往習慣，應該全面整合HP，未來幾年好繁忙。Cally主管HP技術服務，亦會係HP未來幾年重頭戲。

HP想致力於超越I記，當然唔係按字母排咁簡單。其中一個目標，係响科技服務超越I記。兩家公司都好靠外國市場帶動增長，抵銷美國衰退影響。I記嘅服務收入佔成百分之五十六，軟件收入亦達到百分之二十四。反觀HP就只有三成收入靠服務，軟件收入似有若無。大部分收入係從賣鐵；例如打印機、伺服系統、個人電腦，依家加埋網絡設備，但邊際利潤比I記亦低超過一倍！(HP:6.7%vs IBM:14%)

I記市值較大，執筆之日有成一千六百幾億美金，HP係一千二百幾億美金，不過以市盈倍數計，I記依然平啲。即使以較流行既淨現金流對市值倍數（Price to cash flow ratio），亦係I記平啲。

但係半杯水有兩面睇法，HP基數低啲，增長能力亦大啲。前年HP以一百三十億美金購入EDS，以後就要靠有機增長，只不過愈來愈多人爭。

上期講起NTT買起咗Datacraft母公司，其實另一家日本嘅電訊公司KDDI，亦買咗DMX，進軍本港同埋大陸嘅SI業務。日本電訊公司點解對SI咁大興趣？真係唔明。不過，記得地鐵行政總裁周松崗形容同日本人打工嘅經驗：「日本有唔少世界級管理人員，但缺乏國際級管理人員。」呢句話可圈可點，今時今日，值得深思。