蘋果擺烏龍

蘋果電腦出 iPhone 4白色版，出新聞稿擺烏龍，本來話網站發售，結果無得賣。公關當然四圍道歉。好難講，皆因蘋果放棄香港基地，主要部門北移，正一係雞飛狗走，香港辦公室「孖屐亭」不復存在。

日後記者查詢借機，全部可能要問中國大陸嘅蘋果同事，好唔方便。不過蘋果當道，中國係大市場，香港只係負責走水貨，加上人口有限（相對而言），重要性愈來愈低，形勢比人強，香港邊緣化，蘋果可能係第一家，但係香港市場嘅重要性，一向同規模唔成比例，蘋果有冇搞錯，唔駛幾耐就知。

講返白色iPhone，因為萬眾期待，各家流動電訊商都嚴陣以待。其中3仔更加在尖沙咀即場請傳媒出機，電訊商靠蘋果iPhone食糊，即使俾人撳住搶都無乎，不過同蘋果合作，限制多多，苦不堪言。聽講Steve Jobs連新聞稿都管，一字不能改，唔怪得做到病。

不過iPhone唔見影，iPad 2就有供貨，各家零售商亦無乜貨交，結果好多排隊買新iPad嘅蘋果迷，亦好唔滿意，做蘋果生意之難，又可見一斑。

另一邊廂，黑莓降低盈利前景預測，皆因出貨量下跌，上星期股價裂口式急跌後，不斷挨沽，累積跌幅近一成，科技股此消彼長，千祈唔好似「東加豆」嗰首歌；『最心痛是，「放得太遲」；有些股票，不可等某個日子』…雖然黑莓新手機亦會轉用Playbook新作業系統，唔少用家可能推遲換機，情況就同諾記一樣。除非迫不得已，否則換作業系統，係非常危險之事。

納斯達克指數過去一年升咗約一成半，另一隻逆市下跌一成半嘅股份叫咪記，上星期公佈業績盈利大升，亦幫唔到股價手，原因受流動設備興起嘅打跌，Netbook銷量下跌，Windows出貨量走下坡，唔駛講又係蘋果惹嘅禍，市場真係未卜先知，走得快好世界。