I記終於有新老頂

HP請咗SAP前老頂，人才流動陸續有嚟。聽講HP請咗SAP前大中華區總裁李文俐（Lee Boon Lee），出任日本及亞太區副總裁。不過SAP屬於商業軟件，同HP嘅基礎管理軟件有啲分別。講返HP，買軟件的確唔容易，HP唔少員工俾O記攆走，兩家公司關係麻麻，HP員工話加盟O記，即刻要起身。

此外，分銷商亦有變動，美國Westcon捲土重來，聽講請咗MTech前地區經理 Stanley Chung坐鎮。Westcon以前亦曾經响香港賣Bay Networks，當時Cyberworld老細Jansen Uy負責領導。目前Westcon做思科產品相當在行，所以對Datacraft或者Macroview嚟講，可能有啲威脅。

Westcon係所謂增值分銷商（Value Added Distributor），即係話亦有服務部門，負責整個破席。話說回頭，即使財雄勢大，今時今日嚟到，唔憂無生意，點搵人就好大考驗。最近連電訊公司都嗌請人好難，尤其PM更渴市。不過聽講Stanley學術數有進步，講唔定有神機妙算。

今個月咪記嘅MSN同 Pixel Media合作，Pixel兼提供內容。Pixel連內容都做埋，可謂新奇。不過MSN同對手Yahoo!實力差太遠，原因之一亦內容太弱，雅虎香港同日本以內容取勝，香港老細Alfred Choi亦計仔多多，MSN即使再搵無乜做內容經驗嘅Pixel Media幫手，頂多叫銅錢買病豬。MSN香港人丁單薄，瀏覽人數不消提，雞肋中之雞肋。

I記老總唐華離位北上，掌管大中華區系統及科技部，香港總經理終於由Tony Tai戴澤棠繼任，Tony Tai過去五年係華東及華中區總經理。佢在九八年亦出任過香港區總經理，八O年香港大學MBA畢業後就一直在I記打工，又曾經去東京工作，做過唔少部門，經驗豐富。