咪記勢成全球最大電話公司

上星期，思科歷史性首度發出盈警，震散股價，再削八千五百個職位，存貨撥備達二十五億美元。此消彼長，思科發盈警當日，豬扒逆市彈升百分之五，上月又公布季度收入再升二成，唔駛講投資者紛紛換馬。

唔止投資者趕住走佬，上月思科嘅保安部門主管Nawaf Bitar亦跳槽豬扒，思科近期高層連接請辭，幾乎可以話係大逃亡。不過亦有人燒冷灶，豬扒高層顏維倫（David Yen）就去咗思科掌管伺服器及虛擬化部門，O八年David Yen從太陽電腦嘅晶片部門加盟豬扒，負責開發QFabric產品線。

過去幾年，思科主攻視像技術同UC（統一通訊，包括話音、視像、即時通訊等），收購Webex、Tandberg同Flip等，又發展Eos娛樂社交平台等。如今Chambers覺今是而昨非，重新集中核心嘅技術，恐怕遲咗半拍。

思科另一頭痛，係咪記收咗Skype。Skype從尋常百姓家開始，陸續飛入商業應用，過程有啲似咪記嘅發跡史。Skype投資者之一，當年創辦Netscape一舉成名嘅Marc Andreessen，今次更促成咪記以八十五億購入Skype。當年佢曾經拒絕出售Netscape俾咪記，堅持獨立運作，結果兩家公司對著幹，終於Netscape俾IE打殘，今日促成Skype收購，商場無永遠敵人。

咪記嘅Q3業務公佈（今年一至三月），UC產品Lync（即以前OCS），銷售竟然激升三成，一枝獨秀。Lync係思科嘅UC產品主要對手之一。UC一直係思科業務亮點，尤其IP-PBX方面，一度所向無敵。不過思科嘅IP電話終端，始終賣得好貴，影响流行程度，思科UC產品相對咪記嘅Lync，所需嘅設備投資，更多得離譜。豬扒就選擇夥拍Polycom發展 UC方案，加上市場上免費IP-PBX（好似Asterisk）流行，思科UC前境相當尷尬。

咪記嘅官方網站話Skype整合不同產品，包括Lync同Windows Phone，點樣整合？其實唔難想像，用咗Lync之後，將來打PSTN嘅CO線、extension內線、跨境 VoIP call之外，仲可打埋Skype。Skype電話及視像會議橫跨全球（舊年處理達二千零七十億分鐘通訊，用戶一億七千萬），加上Skype in或者Skype out功能，到時員工打對外長途電話或者視像會議，就用直接用Skype或者Skype out，接收客戶環球熱線來電，或者Call center等支援，就用Skype in，省回大筆通訊費，呢項收購好有協同效應。其實思科一早應收購Skpye，點解俾咪記捷足先登？

Skype加上咪記 Live Messager，可能已經係全球最大電話公司。捻到呢到，莫講話思科要沽，其他做Call Center或者國際電訊商，全部揸唔過。