2011年5月11日星期三

難兄難弟

HP請咗SAP以前老頂做 CEO,HP再宣佈成為首批SAP 雲端服務全球供應商,加強SAP業務關係。SAP上季業績唔錯,但係同O記嘅官司沒完沒了。舊年SAP被控侵權,結果被美國陪審團判罰十三億美元,正提上訴,有排頭痛。

SAP响O五年,收購專做支援PeopleSoft嘅TomorrowNow,當時PeopleSoft剛被O記收購,如意算盤係想向TomorrowNow客戶落手,趁PeopleSoft客仔舉棋不定,撬其牆腳,結果算盤打唔響,偷雞唔到,仲蝕揸米。

TomorrowNow本來係PeopleSoft最大技術拍乸,一向有權代客戶下載PeopleSoft嘅源碼,以便支援。但被SAP收購後,關係即刻唔同咗,變成係商業對手,結果SAP馬上被O記控告盗取商業機密,可能要支付史上最高罰金。O四年,O記以一百零三億美金買起PeopleSoft,如今收番十三億,即刻有賺。

所以收購前嘅盡職審查(Due Diligence)或者法律責任風險評估,非常緊要,否則加埋蘇州屎,條數好捻計,分分鐘聲譽都輸埋。最近HP亦俾香港政府控告交唔到貨,聽聞亦係收購EDS嘅後果。以HP嘅公司管治,唔係咁易出錯,其他人以前家教不嚴,就好難講。

SAP同I記亦有段古。兩年前I記曾被當時SAP老頂Leo Apotheker(即係而家HP老頂)公開批評,話I記嘅SAP顧問唔夠班。I記即刻加強同另一家較細ERP廠家嘅Lawson合作,最近傳出收賣佬Infor有意收埋Lawson。以服務合約規模而論,SAP依然比Lawson大得多,不過I記近年一直好支持Infor,拍乸會議定必贊助到底。I記軟件阿頭Steve Mills亦講明,唔考慮買Lawson,以免因小失大,製造仇家。換言之亦唔想得罪SAP。

事實上,HP收購3Com,得罪咗思科,去年初終止HP整合商地位,估計令HP流失思科服務合約。同O記關係亦麻麻,硬件直接競爭,合作機會減少。

拍乸愈來愈少,真係難為了家嫂。

沒有留言:

發佈留言