儲存市場新貴

儲存市場熱鬧，上星期NetApp推出新管理產品OnCommand，進軍雲運算市場。NetApp可算係異數，以NAS起家，拍住IBM砌EMC，而家直銷亦唔錯，香港分銷Systex老細Rayman Hui飲得杯落，上星期响灣仔大押酒吧搞拍乸聚會。
NetApp做NAS起家，「性價比」好，以高性能儲存，仍包括EMC、HDS，HP因為購入咗3Par，可算埋一份。高性能儲存通常指讀寫速度IOPS強勁，原來後來居上，大有其人，包括O記嘅Exadata。最近有人引入一隻Xiotech嘅儲存產品。董事局粒粒皆星；近年加入兩位 EMC前高層，亦同樣因收購WysDM而加入EMC。WysDM做據保護起家，Xiotech行政總裁Alan Atkinson曾擔任EMC儲存軟件部VP，首席策略官Jim McDonald仲出任過EMC技術總監，前年睇中Xiotech前景加入，再獲風險基金Oak Investment入股，未來可能係熱炒股之一。
唔少人相信未來虛擬桌面及雲運算，都要高速IO，Xiotech技術原本由迪吉多工程師開發，後來由Seagate接手，再出售俾Xiotech，一波三折。除咗IO讀寫速度比競爭對手高十幾倍，穩定性同耐用程度亦高出百幾倍，投資回報率好高，又有自我修復性能，有成五年保養期咁長。
技術推陳出新，人材又經常流動。Vidyo嘅前亞太區高層Alfred Chase Hui，加盟另一家保安技術公司Certes Networks，專門做加密同埋VPN技術。
前摩記嘅Irene Lai，原來已經入咗O記做公關，聽日O記IT經理論壇，响旺角朗豪酒店全日進行，唔駛講亦係講近期熱門嘅Exadata，原來Exadata銷量已超過一千部。講起摩記，亦有好多活動，分銷商聯強就推平板Xoom，嘉靈就代理摩記嘅無線區域網產品，唔知摩記AP有乜特別，上星期就請拍乸去銅鑼灣世貿飲番杯，順便吹吹風。