2011年7月27日星期三

上市不成空餘恨

思科地震,全球裁員一萬一千五百人,減番出售機頂盒資產俾富士康,實炒六千五,以思科作為龍頭企業,的確好傷。自從思科將Flip折埋,已經顯示勢危,意識到必須集中火力,整固企業同電信商市場。另一單不利消息,啱啱戴爾就收咗網絡器材Force10,呢家公司年初四圍招聘,豬扒唔少人收過柯化,甚至連紅帽同埋HP亦有人聽過,後來聽聞Crossbeam有人跳槽。
好多同業以為Force10短期內上市機會唔高,落疊興趣唔大,如今俾戴爾收埋,入局者希望落空。戴爾收咗Force10網絡產品,加上年初收咗Compellent儲存,加上iSCSI為主嘅EqualLogic,低價位嘅PowerVault儲存,產品線已經成形,加上戴爾經常劈價,市場上多隻大香爐。
交換同路由器係思科嘅重頭戲之一,類似Force10之類網絡廠商,功能唔錯,價位就好低,搞到思科好頭痕,加上H3C同DLink之類亞洲廠商,新興市場好難打入,中檔市場食之無味,已經係雞肋。前年開始,豬扒開始轉型搞軟件,專攻網絡軟件方案Junos Space,加上Junos又比IOS先進穩定。高低檔市場兩頭夾擊,UC市場又愈嚟愈商品化,思科靠賣鐵維生嘅日子,真係唔易過。
上星期中,科技股河床公佈業績,盈利符合預期,升咗八成,但營業額唔達標,股價插水,由四十蚊美金,大跌二成幾,剩番三十一蚊。證明炒科技股要食定驚風散,仲千祈唔好談戀愛。
河床又收購英國專門做負載平衡軟件嘅Zeus,又收購埋做優化Web內容傳送軟件Aptimize,即係所謂應用傳送控制器ADC。大家都知,呢兩項技術正係F5同Citrix強項。事實上,河床亦係趨向變成一家軟件公司,佢哋嘅優化設備Steelhead一早就有虛擬版Virtual Steelhead。河床幾乎已經係網絡優化市場霸主,即使股價跌二成,市盈倍數依然有一百,相當犀利,加上不斷收購,想併購唔係咁易。今年河床嘅大中華區再搞拍乸大會選址四川省會成都舉行,唔少拍乸加入,未來大陸盈利應該唔錯。

沒有留言:

發佈留言