系統升呢

上星期國泰系統升級，搞到本港兩家大電腦公司，唔少人忙到一頭煙，唔止有煙，仲傳到話有火添！上星期國泰網上訂飛唔多順，熱線電話打極唔通。雖然話，系統升級經驗豐富，但係老貓都會燒鬚。國泰系統已經係八十年代產品，捱到今日算係咁，但訂票管理追唔上要求，必須要升呢。不過全球唔少客仔投訴，有排煩。

有O記同事話，新航之前升級訂票系統，亦搞咗半年，今次算係快手，系統升呢始終有風險，客仔唔滿意，損失可以好大。三月份聯合航空同大陸航空嘅系統亦會合併，到時分分鐘歷史重演。

本港IT除咗國泰係大客戶，近年馬會投資唔少。以系統嘅「關鍵」程度，有人話全港四大系統包括國泰、馬會、聯交所同飛機場。馬會客仔落唔到飛，分分鐘緊要過航飛公司訂唔到飛。

單記老總Michael話，馬會嘅Mobile App好收得，系統亦升呢快好多，尤其係六合彩投注，已經唔駛去投注站。雖然係人都知馬會係咪記大戶，手機投注服務App只支援iPhone及Android。

不過係人都知，馬會做孖屐亭嘅Richard Cheung好犀利，哈佛大學高材生，又做過麥肯鍚。上場已經出「回扣」殺手鐧，投注率一直上升。聽講呢位Richard，讀哈佛已經超級馬迷，搞到馬會修例，俾員工落注博彩，做馬會特別落力。