師奶愛陳豪

新年開始，雖然金融業盛傳裁員，但IT業未聽見收縮，唔少繼續請人，兩家F字頭嘅公司都响度四周搵人。舊年V字頭電訊商有少量裁減，唔少電訊商同SP，相繼大搞數據中心，加上擴張IT外判同雲端業務意，賣設備嘅公司，吼實SP同電訊商，仲要增聘添。

前年NTT收購Data Dimension，亦即係前身Datacraft。KDDI又收購MDX股權， 年盛傳P仔出售外判業務俾神碼。一時之間IT外判業好似七國咁亂。

NTT响香港、新加坡、日本新建大型數據中心，上星期新加坡Serangoon數據中心率先落成，規格講究，係第四級嘅數據中心，每隻櫃供電有成12kVA，密度幾高都夠，專針對金融業高速交易同私有雲。NTT香港嘅數據中心預計二Ｏ一三年落成，規模係日本境外最大。Datacraft區內唔少金融客，食正條水。不過，唔少Datacraft舊人收購大有斬穫後，傳聞唔少短期離任，加上其他SP擴張IT外判業務，有唔少PM職位出現。

至於收購MDX嘅KDDI就對網上音樂或者流動電訊興趣比較大，最近又夾中國移動，响內地推日本出產嘅Android Apps，MDX負責同中移動合作，開發內地市場，KDDI對企業市場似乎興趣唔大，仲有淡出趨勢。日本流動Apps攻內地有無市場？以受日本文化影響程度，照計香港嘅機會仲大啲。

P仔大改組後，聽講開會頻頻。據聞陳豪做家居網上行寬頻代言人好成功，生意有改善，證明陳豪貴啲，真係好有客緣，特別係屋邨師奶，遲啲唔知會唔會搵佢幫埋商業網上行，可能好過鍾舒漫，雖然唔夠薄餅咁有創意，至少好有誠意。

類似I記同埋HP都大舉擴張IT外判，競爭好大。近幾年IT業變化好大，市場成熟得快，新技術留強汰弱，但電訊商轉型，流動通訊需求大增，帶動唔少機會。P仔Bruce二月份上任CMO，呢個職位暫時無人知做乜，肯定有大搞作就唔駛講。