2012年2月1日星期三

新年新氣象

IT技術優勝劣敗,唔駛呃你十年八年,好快歸邊。以廣域優化市場嚟講,舊年河床市場佔有率,據Gartner統計已經有半璧江山,而BlueCoat佔有率從兩成跌至不足一成,舊年底BlueCoat更被私有化,思科勉強維持二成佔有率左右,豬扒差不多完全退出廣域優化市場。

有人辭官歸故里,仍有新競爭者加入;另一家叫銀山(Silver Peak)嘅廣域優化產品,O八年先加入市場,市場佔有率雖然不足一成,但已係唯一佔有率上升嘅競爭對手,最近終於來港推介,銀山主要客戶係數據中心,據網頁介紹話ARM、Autodesk、谷歌、Linklaters、VMware都係客仔。

最近,銀山亞太區系統工程總監Shamil Fernando嚟香港推介產品,目前分銷係Westcon,聽講話香港亦會駐同事,佢哋有一個免費版本,全裝 VMWare上,可以試啱先買,不過河床嘅電信商分銷網絡好強,知名度亦高好多。但係Westcon老頂Stanley Chung做過BlueCoat,對廣域優化一啲都唔陌生。

另一單有趣新聞,係IT嘅大老Hansen Chang,最近竟然重出江湖,加入Infoblox做亞太區銷售老頂,佢老人家曾經領導未上市前Netscreen,又响太陽及I記做過高層,唔少人跟佢搵過食,本來早已退隱夏威夷好耐。Infoblox老頂 Robert Thomas曾經亦係Netscreen全球老頂,從太陽過檔Netscreen時亦請Hansen幫手管過亞太區,請佢老人家出山。Infoblox已經申請今年上市,呢間公司專門搞IP位址自動管理(IPAM),明年上市話唔定掀起熱潮。

沒有留言:

發佈留言