美國科技股行情看漲

雖然話經濟前景好多隱憂，春茗幾乎家家科技公司都話到數，以儲存公司生意甚好，儲存大廠EMC一月中公佈第四季業績，全年營業額達二百億美元，比舊年上升達一成八，而每股盈利則上升二成，股價馬上急升，港澳區老頂Gabriel Leung話本港市場升幅更犀利，亞太區已經成為美國科技公司嘅增長動力來源，唔怪得啲機票愈來愈難卜。

儲存廠商包括HDS及NetApp生意亦都唔錯，但EMC前年底以二十二億五千萬美記購Isilon，呢家公司專門做非結構性數據嘅NAS，舊年蘋果買咗大量儲存推iCloud，傳聞話首批儲存量達12 PB。Gabriel話今年香港有唔少數據中心，相信業績更上層樓，佢話香港最大問題係土地供應唔夠，Liz Tse已好盡地搵地，但香港奉行自由政策。Gabriel話新加坡推數據中心由部長級直接負責，仲要孭數，比香港落力好多，搶咗唔少地區性Tier 4數據中心。新加坡部長最近減完人工，年薪似然過千萬，相比Liz Tse只係D8，制肘又多，做到咁算唔錯。

咪記每年三月初都搞Techday，除咗有美國專家嚟港，通常亦會預先介紹最新產品，今年最矚目嘅技術係SQL 2012及Windows 8。至於SQL，產品經理Lenie話今次 2012包括好多新功能，包括咗結合Excel嘅Power Pivot同PowerView，令BI嘅視覺效果相當震撼。舊年十月唔少人响港麗酒店睇過SQL 2012介紹，都話印象深刻。

唔少人已經在Youtube上介紹Windows 8嘅新功能，3D效果睇到頭暈。年電腦廠商大力推Ultrabook，加上Windows出新版本一般有助銷情，又支援ARM處理器。舊年PC被Tablet同iPad打到飛起，今年絕地反擊，市場肯定熱鬧。美國好多家大科技公司組成嘅Technet調查指出，自從二OO七年iPhone推出，美國人做流動設備嘅應用，已經產生咗差不多五十萬份職位，美國靠 IT救國，唔係亂嗡。

http://www.technet.org/