有毒蘋果

上星期最大IT新聞，莫過於蘋果股價單日急升百分之八。蘋果業績強勁，尤其iPad銷售，分析人員跌哂眼鏡，股價一支獨秀。除咗iPhone同iPad，個人電腦Mac機銷售亦勁升，尤其亞太區表現強勁。但據咪記分析，Mac機銷售並無帶動Office嘅Mac版本銷情。咁Mac用戶購買電腦要嚟做乜？可能係娛樂或者多媒體用途居多。

不過據保安廠商Kaspersky老細Eugene Kaspersky就贈興，話蘋果嘅保安比咪記落後十年，渠預測Mac機嘅惡意程式會愈嚟愈多。較早前流行嘅惡意程式Flashback，仍然影響好多Mac機用戶。以往Mac用戶好少安裝防毒程式，防毒廠家加強宣傳，加上Flashback打破Mac平台安全神話，以往大家以為蘋果Mac機唔駛防毒，今後可能無咗呢個優點。

不過，蘋果盈利主要來自iOS平台，利用App Store先測試過後先俾用戶單撈，減低咗唔少風險。除非大家可以搵到攻擊iOS嘅漏洞，否則保安問題對蘋果盈利影響，唔會好似以前咪記咁大。

講番中國，淘寶網境外最大競爭對手eBay，上星期升咗CTO林奕彰做大中華區行政總裁，之前嘅CEO廖光宇年初已辭職，二月份跳槽去咗Visa做中國區老總。廖光宇以前做過渣打，主要經驗都响金融方面，又為eBay中國引入PayPal，終於返老本行。而John Lin就係做技術出身，之前擔任亞太區CTO。eBay响中國發展一直麻麻地。即使本港市場，亦飽受淘寶競爭，睇吓John Lin有乜新法寶。