泡沫再現？

講起唔少IT保安公司都近期登陸香港，其中專門做保安漏洞檢查嘅Rapid7，渠哋嘅亞太區銷售工程師Michael Lai，專門幫唔少公司做Vulnerability Test，例如模擬黑客入侵手法，測試網絡設計、應用等，有乜俾黑客入侵可乘之機。
唔少公司俾咗好多錢做保安，黑客一樣如入無人之境，所以要 Rapid7好似照X光咁，掃描下內部有乜問題，唔照尤事可，一照嚇親人。例如路由器防火牆設定錯咗，甚至程式有缺陷，渠話美國甚至有次發現，黑客竟然可利用公司內視像會議系統嘅設定漏洞，神不知鬼不覺，自動開啟視像會議系統，黑客好似親身入咗公司，偷聽哂所有開會談話嘅內容！美國唔少公司發現呢個漏洞之後，請渠哋檢查。
不過如果公司發現有漏洞，係唔係代表可馬上堵塞；例如部分攻擊Web伺服系統漏洞嘅方法，即使知道都好難應付，一般防火牆都未必有效防止，例如利用SQL語言漏洞，通過網頁URL進入嘅SQL Ingestion，單靠IPS辨認有問題嘅查詢，好多時根本行唔通，SQL語言組合以千萬計。防止透過Web應用漏洞潛入嘅攻擊，Michael話有兩件產品都唔錯，其中一家係大家都識嘅F5，另一家就係底美國上市嘅Imperva嘅SecureSphere，呢家公司股價唔錯，十八美金上市，曾經上過四十幾蚊，升超過一倍，最近回落三十五蚊附近。Michael話呢隻產品台灣話賣得唔錯，產品好獨特，愈來愈多公司受到來自Web嘅攻擊後，呢類產品香港應該有市場。
最近美國科技IPO表現一直唔錯，加上飛卜預計下星期上市，大家好期望另一次IT股熱潮。不過飛卜市盈率實在好高，已經有人唱淡，投資者似乎唔理，一路Like飛卜，預計好容易突破一千億美金，飛卜上嘅最大社交遊戲Zynga，响飛卜公佈上市意向價，股價馬上升咗一成幾。Zynga佔咗飛卜收入約莫一成二，渠哋遊戲全靠飛卜平台，上市後表現唔算突出。