食軟唔食硬

飛卜上市，適逢歐羅危機，股價仍以最高上限訂價，保薦人大細摩頂得好辛苦。飛卜嘅市值高達一千億美金，超過HP一倍，究竟係飛卜估值過高抑或HP真係唔值錢？飛卜舊年全年營業額係三十一億，HP就有一千二百七十幾億，大概係四十分之一。

執筆之日，HP市值跌剩四百二十億美金，以IT公司嚟講，只係I記同咪記嘅約四分之一，點解落差咁大？

HP六月落實改組，肯定有裁員壓力，有幾多人無得留低？謠言滿天飛。眾多部門之中，以做嘅PC嘅為危，軟件前景亦穩妥，打印則仍係盈利重心。

舊年唔少人HP超平價TouchPad，後來話呻笨，證明HP當日壯士斷臂好正確。HP消費電子產品成績麻麻，先後推出過影相機同手機，結果草草收場，好難寄望平板有奇蹟，相信早對消費電子死心。

PC好睇唔好食，收入多而盈利少，服務器孖展亦受壓，唯一出路係轉往高檔硬件，或者提高軟件部門收入。可惜至今多項硬件收購，協同效應一般，3Par同3Com似乎收入幫助有限，Palm更完全報銷。

至於軟件Mercury甚至ArcSight，甚至近期超高價收嘅英國Autonomy，仍於處整合期，對IT服務部門收入長遠亦有啲幫助。今年第一季，HP軟件收入上升咗三成，但都係得九億幾美金，佔收入百分之三。I記第一季軟件營收有七十六億，佔總收入二成六。未來盈利係粥定飯，可能全靠軟件。