火眼與野火

惡意程式變種好快，搞到防毒軟件畀錢等如白費，裝完等如白費。美國近期流行Advanced Persistent Threat，專門對付頑強又難以偵察嘅惡意程式，APT方案又以Fireeye「火眼」最出名，去年底獲「細摩」公開表揚。「火眼」今年一月新一輪集資，再籌五千萬美元，前後共集資一億，目前估值十二億五千萬美金，今年估計係納斯達克最紅IPO之一。

「火眼」CEO好有來頭，就係前「賣咖啡」老頂Dave DeWalt，曾一手醫好並揍大「賣咖啡」，以七十八億天價，出售畀英特爾。DeWalt亦曾經掌管Documentum，後來亦以十七億美金被EMC所收售。DeWalt可算係矽谷當今最炙手可熱CEO。「火眼」响亞洲區，已請咗好多人，原本Rapid7嘅珊姐亦已過檔，豬扒嘅日本及韓國SE亦加盟。

「火眼」新一輪投資者好有來頭，包括咗高盛、Sequoia Capital、豬扒及Silicon Valley Bank等藍籌投資者，豬扒加入，大概為防止思科收購。「火眼」專門用於偵察及消滅頑固惡意程式。網上針對金融業攻擊愈嚟愈多，相信「火眼」响本港搵客戶唔難。

除咗「火眼」，新一代防火牆Palo Alta Networks亦發展Wildfire「野火」技術，作用類似 「火眼」，用戶下載任何程式前，先以Sandbox安裝一次，透過程式行為，判斷是否惡意，即使惡意程式屬於潛伏攻擊，亦無所遁形。