2013年1月16日星期三

風水輪流轉

聽日O記有聚會,介紹P仔商業部門空降嘅蕭姐出場,取代上廣州嘅Wilson。蕭姐從電訊營運商轉過嚟,公司文化唔同,以往唔駛直接應酬傳媒。原本想講業務策略,重點當然係ExaData,但大家可能關心 Java嘅安全問題多啲,變咗一場危機管理。最近O記公關搬咗上京,真係唔知可以問邊位。


Java係全球最流行軟件,無處不在,當然變咗黑客頭號目標,唔止一次被評為高風險,蘋果舊年主動解險Mac機上Java安裝。今次美國國土安全部發出警告,呼籲停用瀏覽器內Java,引起公眾恐慌,有人連電腦都唔敢開。O記唯有好似咪記咁,加快推出更新。今次咪記可能最心涼,以往保安事故,渠哋應付唔少,特別IE經常被數落,今次可謂風水輪流轉。

Singtel舉辦本港首次i-lluminate大會

廠商推產品,營運商就推服務。今年四月,Singtel舉辦本港首次i-lluminate大會,呢個大會响新加坡規模好大,專門介紹科技趨勢,Keynote發言嘉賓選定咗Daniel Burrus,呢位先生係暢銷書Flash Foresight作者,曾經現身唔少大公司Keynote論壇,專程來港演講,價錢一定唔低。舊年Singtel進行咗大幅改組,期望五年成為亞太最大嘅ICT服務供應商,Singtel擁有NCS,技術整合能力唔錯,又有跨地區優勢,推廣亦比本地營運商更積極。

聽Autodesk嘅老頂Wendy小姐話,話今個星期五資訊財務師協會教育基金(ITAAeF)有一場勵志電影《珍惜》首映;鼓勵年青人加入IT界,滿足本土IT界長遠人力資源需求。原來主辦單位資訊財務師協會(ITAA)成立咗十二年,由專業人士綜合 IT 及財務會計管理資源, 搭配取得協同效益;直係唔講唔知。

沒有留言:

發佈留言