保安市場變天

根據Gartner報告，全球每年花咗一百七十七億美元安裝保安軟件，其中七十四億購買防毒軟件。究竟裝咗防毒，係咪安枕無憂？上星期紐約時報報導，防火牆公司Impreva利用新變種病毒，測試防毒軟件，大部分成功偵察率唔到半成。

每年防毒軟件有新驚人發現，2010年係Stuxnet，今年就係Kaspersky Lab研究人員再發現Flame，以及Gauss。Flame連續運作五年，一直無被發現，盗竊唔少機密，活躍中東地區。Flame如入無人之境，Kaspersky解釋，病毒非常先進，只有國家機構先至寫得出。Gauss特別針對中東區銀行，究竟有乜人，對中東銀行咁有興趣？

不過，國安利用間諜軟件作為武器，不法之徒亦可以利用呢啲軟件發動攻擊。I記收購數據保安軟件Guardium，O記就推出Oracle Audit Vault and Database Firewall ，監視網絡流量分析數據，保護Oracle同埋其他數據庫。

新一代防火牆，好似Impreva或Palo Alto，主要靠分析軟件行為，判定某啲軟件係唔係受咗感染。據統計，Malware數量急升，2010年經超過四千九百萬種，唔少難以防範，大部分防毒軟件幫唔到手，今年保安市場相當熱鬧。