科技股首季業績埋單

上星期，美國科技股表現麻麻，股價繼續受業績拖累。蘋果股價跌破四百美元心理關口，從上年九月份七百美金高位起計，回落超過四成。另一家股價急跌嘅係Dell，原因係私募基金黑石，決定退出收購Dell，原因係看淡PC前景。Dell股價下跌，反而有利Dell私有化。大約一年前，Dell已經進行多項收購，轉型數據中心及IT服務，下跌令私有化機會增加，業績改革唔需要再只受市場壓力。

那邊廂，咪記公佈第三季業績盈利升19%，股價一度重上三十美金水平。但IDC公佈PC銷情黯淡，咪記流動市場又無乜進展，市場對前景仍然唔敢太過樂觀。但咪記公佈業績，一直持續較市場預計為好，實在唔可以睇得太淡。

I記公佈盈利亦低於預期，結果股價跌超過8％，破二百蚊水平，落至一百九十蚊先有支持，有消話第二季仲可能裁員；或者再出售低檔伺服系統，買家可能係聯想。聯想一直有向I記購買授權，生產X86伺服器。但I記軟件增長理想，再出售業務機會唔高。

提起I記，負責硬件系統嘅STG部門，上星期Blue Ocean夥伴業務又响半島酒店聚會，人山人海，見到原本做拍乸業務嘅Micheal Choy，已經轉任STG經理，Savio Ng則又再上一級。

剛接通知，以前從太陽過渡到O記，做開系統業務嘅Willie Hung，後來過檔到CA後，最近升為香港及台灣銷售阿頭。河床亦終於搵到大中華區銷售主管，以前曾經做過EMC嘅Patrick Yuen，亦係香港人。至於近期招兵買馬嘅Nutanix，銷售總監係以前BlueCoat嘅Matt Young，亦有唔少舊部歸隊。