小米神話

報紙話，小米估值一百億美元，又請Android副總裁Hugo Barra加盟，明顯為上市熱身。Barra過檔，顯示小米認股權證吸引，上市又近一步。另一家靠手機翻身係聯想，較早公佈業績顯示，國內手機及平板表現強勁，Android變咗靈丹妙藥，食咗廠商家家興奮。

Android改變咗流動運算，救番唔少廠家，最大得益當然叫三星，其餘華碩、新力、Acer，紛紛想靠Android翻身。智能電話同平板，成下一浪炒作，各顯神通，但市場就愈來愈分散，價錢愈來愈低，流動營運商要靠補貼手機嚟上客，愈來愈難。

上星期，話Steve Ballmer退休，咪記股價應聲向上。咪記失去咗流動電訊商機，係基金向Ballmer逼宮原因之一。流動同平板暢銷，PC愈來愈難做，但係Windows可唔可以靠新版本翻身，就愈來愈令人懷疑。

收到咪記Alice傳來關於Windows副總裁Antoine Leblond博客文章，講已向硬件合作夥伴，提供Windows 8.1正式版本，即係所謂RTM（ready to manufacturer）版本，為10月17日8.1版上市重新出發做準備。但係咪記並無將RTM版本，放上TechNet及MSDN向專業軟件開發訂戶發佈，反而要在十月份，先至向軟件開發商同時發佈，開發人員無法預先測試應用在8.1上兼容性，結果罵聲四起，Windows好依靠開發人員，點解搞成咁？咪記RTM一向預先畀MSDN下載，今次例外，唯一解釋可能係除蟲須時，正努力補救。8.1唔會有奇蹟出現，幾乎可能肯定。