火眼上市

上星期大地瓜老總Francis請食晏。話題落在上市嘅火眼（Fireeye），大地瓜有唔少銀行客戶，特別注重保安，APT之中又以火眼近期最紅，老頂Dave Dewalt更係矽谷明星CEO，曾經出售賣咖啡畀英特爾。高盛甚至私人貸款借錢畀火眼創辦人Ashar Aziz一千萬美記，可見睇得幾好。

火眼受追捧，炒APT概念，花花轎子，上市訂價從原本每股12-14美金，上調到最終每股20美金，集資額達三億零四百萬，已高過舊年新一代防火牆Palo Alto集資額二億六千萬，上市後曾升一倍幾，最高四十四美金，市值四十幾億。火眼仍唔夠銷售往中國內地等市場，估值竟然咁高。有人話下一波將係Zscalar，雖然有Palo Alto前老頂Lane Bess做COO，聽講請人好難，短期內上市有難度。

上星期，MIG搞CIO Summit，火眼Matthew首先講APT，然後Palo Alto嘅Jones亦講嘅都係講APT，Palo Alto亦有Wildfire，專門對付APT。最近Macros Ong從F5過檔Palo Alto，渠以前做Crossbeam，對保安並唔陌生。火眼嘅香港區銷售珊姐做開賣咖啡，亦出名勤力。APT市場突然當紅，人人都講。

上星期最駭人聽聞，莫過於贊助英超嘅柏克萊銀行，兒戲至畀賊人响分行入內安裝KVM，分行一舉一動，賊人外間掌控，唔使裝APT咁高難度，已經偷走一百三十萬英鎊，可見保安買乜都假，最緊要係意識。

iPhone出5S，「土豪金」當炒，蘋果靠俗氣上位，教主在生唔知點睇？5S內加咗M7，話可慳唔少電；三星Note 3開售，強調高通晶片開始加入Envelope Tracking技術，動態向訊號處理器供電，延長續航力，方便坐車長時間煲劇 。英特爾向三星供貨嘅Galaxy Tab 3內，英特爾XMM 7160亦有ET技術，因為4G極之耗電，LTE電話為慳電，各出奇謀。

上星期打風，航空公司電話打唔通，又以加菲最甚。CX嘅馬可孛羅同亞洲萬里通熱線服務一向繁忙，系統需求太大，近日已經打唔通。尤其係乘客訂座系統（PSS），容量爆滿。近月好多人打唔通電話，皆因系統工作好慢，似乎又到瓶頸，乘客靠電郵或飛卜先可改位。新CIO系Joe Locandro ，剛好上任一年，不過系統容量不足問題，應該係上手留低，熱山芋點搞，睇下最佳CIO有乜板斧。